You are here: მთავარი ჩვენს შესახებ კლუბის ისტორია

კლუბის ისტორია

ბათუმის  საჭადრაკო სკოლა "ნონა"

  ძვირფასო სტუმარო,

  საქართველო უმდიდრესი ტრადიციების ქვეყანაასაკმაოდ დიდი როლი ამ მხრივ ჩვენი ერის საჭადრაკო გენიას მიუძღვის. ამის თვალსაჩინო დასტურია ის რომ საუკუნის მეოთხედ მანძილზე საერთაშორისო დიდოსტატებს ნონა გაფრინდაშვილს და მაია ჩიბურდანიძეს ღირსეულად ეპყრათ საჭადრაკო ოლიმპი. აჭარის საჭადრაკო სკოლაც ქართული ჭადრაკის მძივის ერთ-ერთ მარგალიტად შეიძლება ჩაითვალოს.

  ბათუმში ჭადრაკს ყოველთვის განსაკუთრებულ ყურადღებას აქცევდნენ და პრიორიტეტულ სპორტის სახეობად მიიჩნევდნენ.

  სხვადასხვა დროს ბათუმელი მოჭადრაკეების წარმატებებში უდიდესი წვლილი მიუძღვის საჭადრაკო სკოლას, რომელმაც წლების განმავლობაში გამოიცვალა უამრავი მისამართი. 60 იან – 70 იან წლებში განთავსებული იყო ქუთაისის ქუჩაზე N5-ში. იქვე იმართებოდა აჭარის პირველობები.

  შემდგომში მოსწავლე-ახალგაზრდობის პარკში აშენდა კოლორიტული შენობა, რომელშიც დაიდო ბინა საჭადრაკო სკოლამ « ციცინათელა » და  30 წელზე მეტ ხანს ემსახურებოდა ნორჩი მოჭადრაკეების აღზრდას, მწვრთნელ გურამ ჭანტურიას თაოსნობით. საჭადრაკო სკოლამ დაარსა კლუბი რომელსაც  ჩვენი სახელოვანი მამულიშვილის, ხუთგზის მსოფლიო ჩემპიონის ნონა გაფრინდაშვილის საპატივსაცემოდ ეწოდა "ნონა". საჭადრაკო კლუბმა "ნონა"- ზღვისპირა პარკთან არსებულ 2 მცირე ოთახში (დუმბაძის N2) დაიდო ბინა, სადაც ყოველ ზაფხულს იმართებოდა საერთაშორისო ფესტივალები, ხოლო ბავშვები  ეუფლებოდნენ საჭადრაკო სიბრძნეს.  

  ამჟამად "საჭადრაკო კლუბი ნონა" ფუნქციონირებას აგრძელებს ბათუმის კომპლექსურ სასპორტო სკოლაში (ფიროსმანის N 14).

  2013 წლის მაისის თვიდან საჭადრაკო კლუბი გარდაიქმნა ბათუმის მერიასთან არსებულ "()იპ საჭადრაკო კლუბი ნონა"-. უახლოეს მომავალში იგეგმება ბავშვთა კლუბის დაარსებაც. კლუბს ამჟამად საკუთარი ბიუჯეტი აქვს და მიეცა საშუალება კეთილმოაწყოს სამუშაოდ განკუთვნილი ოთახი, შეიძინოს საჭადრაკო ინვენტარი, შეუქმნას კლუბის წევრებს, მეცადინეობის საუკეთესო პირობები. დანიშნოს დიდოსტატებისთვის და წარმატებული, იმედისმომცემი პატარა მოჭადრაკეებისათვის სტიპენდიები, პრემიები, ჯილდოები, ჩაატაროს მასტერკლასები, ლექციები, ერთდროული თამაშის სეანსები, მეგობრული მატჩები, მოაწყოს შეკრებები, მოიწვიოს მსოფლიოში აღიარებული დიდოსტატი პროფესიონალი მწვრთნელები, უზრუნველყოს საჭადრაკო კლუბი ნონა- გუნდის მონაწილეობა საკლუბო ჩემპიონატებში აჭარის სახელით, რაც დიდი ხანია ვერ ხერხდებოდა ფინანსური პრობლემების გამო. ვფიქრობთ მათთვის ეს უდიდესი სტიმული იქნება წარმატებისათვის

  ბათუმს  სხვებთან შედარებით, მნიშვნელოვანი გეოგრაფიული უპირატესობა აქვს, ზღვისპირა საკურორტო ქალაქია, ხოლო  ხელშეწყობის შემთხვევაში განვითარების და აყვავების უდიდესი პერსპექტივა და პოტენციალი გააჩნია. ახლო მომავალში იგეგმება მაღალი დონის საერთაშორისო ტურნირების ჩატარება, რაც კიდევ უფრო გაამდიდრებს და გაამრავალფეროვნებს ტურისტულ იმფრასტრუქტურას და ბათუმს აქცევს ელიტარულ საჭადრაკო სამყაროს ქვაკუთხედად.

  გვახარებს ის ფაქტი რომ ქალაქის საკრებულო მერიასთან ერთად გვეხმარება არსებული პრობლემების გადაჭრაში. რაზეც უდიდეს მადლიერებას გამოხატავენ ბათუმელი მოჭადრაკეები და ჭადრაკის მოყვარულები.

  გვეამაყება, რომ საჭადრაკო კლუბის წევრები არიან: საერთაშორისო დიდოსტატები: სალომე მელია (საქართველოს, მსოფლიო და ევროპის ასაკობრივი პირველობების მრავალგზის ჩემპიონი და პრიზიორი, არაერთი მაღალი რანგის პირველობის გამარჯვებული და პრიზიორი), ნინო ბაციაშვილი (საქართველოს ასაკობრივი პირველობის მრავალგზის პრიზიორი,  პრესტიჟული საერთაშორისო პირველობების მრავალგზის გამარჯვებული და პრიზიორი ), გაიოზ ნიგალიძე (საქართველოს ასაკობრივი პირველობის არაერთგზის გამარჯვებული, სხვადასხვა რესპუბლიკური და საერთაშორისო პირველობების არაერთგზის გამარჯვებული და პრიზიორი), საერთაშორისო ოსტატი  მირანდა მიქაძე (საქართველოს ასაკობრივი პირველობის არაერთგზის ჩემპიონი, მსოფლიო და ევროპის ასაკობრივი პირველობების მრავალგზის პრიზიორი).

  ქალაქის ხელისუფლების ზრუნვის შედეგმაც არ დააყოვნა კლუბს უკვე აქვს პირველი დიდი წარმატებები: სალომე მელია ბელგრადში ქალთა მე-14 ევროპის ჩემპიონატზე ვიცე ჩემპიონი გახდა, გაიოზ ნიგალიძე უმაღლესი ლიგის გამარჯვებულია და საქართველოს ჩემპიონის ტიტულს ატარებს. ხოლო საბერძნეთის ქალაქ კავალაში დასრულებულ საერთაშორისო ტურნირზე წარმატებით იასპარეზა ნინო ბაციაშვილმა, რომელმაც ქალებში პირველი, ხოლო ვაჟებში მეექვსე ადგილი დაიკავა.

      შესაძლოა ახლა აქ ჩვენს გვერდით მომავალი მსოფლიო ჩემპიონები იზრდება...

                                                                                                                                                               ავტორი: მარიკა ჯაფარიძე

ფოტო გალერეა

ჩვენი კლუბი