-"მდიდარი წარსულიდან, ნათელი მომავლისკენ!"

28 დეკემბერს სასტუმრო "ჩაო"-ში, საჭადრაკო კლუბ "ნონა"-ს პრეზენტაცია გაიმართა.

ღონისძიებას ესწრებოდნენ თვითმმართველი ქალაქის ბათუმის  საკრებულოს და მერიის წარმომადგენლები და ოფიციალური პირები.

პრეზენტაცია ორი ნაწილისაგან შედგებოდა. პირველი ნაწილი საკონფერენციო დარბაზში გაიმართა. კლუბის დირექტორმა გიორგი ჭანტურიამ დამსწრეთ გააცნო კლუბის წევრების  მიღწევები და ტექნიკური შედეგები. კლუბის მენეჯერის და მწვრთნელის მარიკა ჯაფარიძის მოხსენება დაეთმო იმ სახელოვან გზას,  რომელიც ბათუმის საჭადრაკო სკოლამ განვლო, "ციცინათელა“-დან საჭადრაკო კლუბ "ნონა"-მდე საქართველოს დამსახურებული მწვრთნელის გურამ ჭანტურიას ხელმძღვანელობით. დიდი სირთულეების წინაშე იდგნენ მოჭადრაკეები წლების განმავლობაში. ამ სირთულეების დაძლევაში გადამწყვეტი როლი ითამაშა ბათუმის საკრებულოსა და მერიის მიერ საჭადრაკო სკოლისა და კლუბის ახალი ფორმატით აღორძინებამ. მოხსენებაში აისახა, თუ რას მიაღწია კლუბმა 6 თვის განმავლობაში და რა  იგეგმება სამომავლოდ. წარმოდგენილი შედეგები  შთამბეჭდავი იყო. მოხსენებას თან ერთვოდა ეკრანზე ნაჩვენები სლაიდ შოუ. მაყურებლის თვალწინ გაცოცხლდნენ სურათები "ძველი" ბათუმის საჭადრაკო ცხოვრებიდან. ეკრანიდან იმზირებოდნენ "ციცინათელა"-ს მომღიმარი მოსწავლეები და მწვრთნელები, ადრეული კლუბ "ნონა"-ს აღსაზრდელები. წარსულს ენეცვლებოდა დღევანდელობის ამსახველი ფოტოები. შთამბეჭდავი იყო ჩატარებული ღონისძიებების, მიღწეული შედეგებისა და წარმატებების ჟამს დაფიქსირებული მომენტების ამსახველი კადრები.

პრეზენტაციაზე სკაიპის დახმარებით პირდაპირ ჩაერთვნენ, თბილისიდან,  ქალბატონი ნონა გაფრინდაშვილი და უცხოეთიდან, საქართველოს ჭადრაკის ფედერაციის პრეზიდენტი გიორგი გიორგაძე.

ორივე ცნობილმა, "ვირტუალურმა", სტუმარმა მადლობა გადაუხადა საკრებულოს და მერიას იმ თანადგომისათვის და ძალისხმევისათვის რაც ესოდენ მნიშვნელოვანია პროფესიული ჭადრაკის განვითარებისთვის. მათ უსურვეს კლუბს  წინსვლა და გამარჯვებები. ჩართვები საინტერესოდ, ბუნებრივ ვითარებაში მიმდინარეობდა და ყველას კარგი განწყობა შეუქმნა. იყო საახალწლო მილოცვები და გულითადი სურვილები.

 მოეწყო კლუბის საიტის (chessbatumi.ge) დემონსტრირებაც. დამსწრეებმა დაათვალიერეს მასალა, რომელიც წარმოდგენილიამითითებულ ვებგვერდზე. საიტის მასშტაბურობამ და შინაარსმა საყოველთაო მოწონება დაიმსახურა.

სიტყვით გამოვიდნენ: მამუკა თამაზაშვილი, ალეკო ჩხარტიშვილი, ირაკლი გვარჯალაძე, გულთამზე ვადაჭკორია, ხატია ტაკიძე. თითოეულმა დადებითად შეაფასა ახლად აღორძინებული კლუბის საქმიანობა. საჭადრაკო კლუბ "ნონა"-ს მომავალშიც წინსვლა და წარმატებები უსურვეს, ხოლო 2014 წელი ბათუმის ჭადრაკისთვის წინასწარ "ოქროს წლად" გამოცხადდა.

პრეზენტაციის მეორე ნაწილი მისაღებ ოთახში ჩატარდა. აქ სტუმრებს ფურშეტი ელოდათ.  საზეიმო ვითარებაში გაიჭრა კლუბის სახელობითი ტორტი.

დამსწრეებმა ტრადიციული ქართული ღვინით ადღეგრძელეს და გზა დაულოცეს ბათუმისა და მთლიანად აჭარის სიამაყეს საჭადრაკო კლუბ „ნონა“-ს.